將於3秒後播放下一段影片
直播經已結束 節目重温將稍後更新
直播即將開始 請稍等片刻
×
直播中

九龍塘41校網,被譽為全港最受歡迎的名校區,但區內有間學校可能無乜家長認識,也肯定不是絕大部份家長的首選,我稱這間是名校區內被遺忘的「名校」,無人認識但又叫名校,係因為呢間學校是專收被名校遺棄、被勸退的學生。

呢間學校小一只有9個學生,不過越高年級,學生越多,每級只有一班但全部收滿,除了由小一開始就讀的學生,亦有唔少來自不同名校的轉校生。小朋友不論哪一年級轉校入讀,但都有個共通點就是自信心崩潰。不過偶然都試過有學生入讀後一年仍是意志消沉,從未抬起頭說話,到底呢啲小朋友在名校受過怎樣的打擊呢?有機會再同大家分享下。

呢間被遺忘的名校,用盡好多方法去幫學生重建自信心,例如安排每一個學生都有上台表演、參與比賽的機會,又或者安排「每人一職」,讓每個學生都有職責,建立他們的存在感、歸屬感。

我參觀過學校,想法比較簡單,我覺得就是師生比例好低,校長、老師用心去愛惜、集中照顧每一位小朋友,讓轉校生一天一點一滴找回在名校失落了的學習信心,這個學習能力不單是學術,而且包括人際關係、興趣等等各方面,這個過程並不是兩三天或一兩個月可做到,雖然經年累月,但只要學校有心,學生總會重拾自信心的。
 
呢間就係九龍城的耀山學校,校長石禮仁,他說:「小朋友條路要自己行,家長好想為小朋友舖好路,想子女未來好行一啲,但始終行路的都是小朋友,無自信心,其實行唔到落去。」
 
多年來教家長替小朋友選校,見到個個家長都望子成龍,好多人都會用盡所有方法培養仔女,幫佢地入名校,諗住為佢地舖一條最好嘅路。但仔女喺呢條路上遇到困難、行得辛苦,發現此路不通,無力再爬番起身嗰時,未必咁好彩搵到人可伸手扶小朋友一把。
 
石校長又話:「雖然我地唔係一間甚麼名校,不過憑住很有愛的老師團隊,給予學生愛和機會,提升佢地嘅自信,雖然他們不是在很出名的學校畢業,但他們一樣很有成就,一樣有醫生、律師,長大後找到自己鍾意的路;而學校的成功,就是讓每個小朋友都有機會『搵到鍾意的事』,『去做鍾意做的事』。」
 
我相當認同他說:「不是一定讀了甚麼學校才有成就,每一個小朋友有自信,有適合自己的計劃,一樣有好嘅人生。」


文章獲八爪魚爸爸授權轉載。
影片獲細路嘢授權轉載。

顯示更多
12:00 2021/03/08